Puxte: Ev gotar li ser têkiliya yekser a zimên bi derhişê subjeyê re disekine. Di navbera zimên û derhişê de şirîkatiyek nêz û pêwendiyek yekser heye. Ziman subjektivîteyê saz dike û her wiha tê nîqaşkirin ku sazbûna nasnameyê zêdetirîn ji aliyê şert û mercên pêvajoya fêrbûna zimên ve tê diyarkirin. Di çêbûna subjeya nasnameyê de biyanîbûna zimanî merhaleya herî krîtîk e. Li gor vê, ev xebata li ber dest hewl dide di nasnameya subjeya kurd de temsiliyeta zimanê kurdî dest nîşan bike. Ev gotar angaşt dike di navbera zimanê kurdî û nasnameyê de sê têkiliyên pir nêz hene ku ev in: di ziman û nasnameya kurdî de girîngiya rabirdûya xwedî imtiyaz a li hemberî dahatûya bêîmtiyaz, tunebûna takekesiyê di peyvan de û her wiha di nasnameyê de, û yên onomatopoeic jî tê de zalbûna dengên xwezayî di zimanê kurdî de, û hêman û meylên xwezayî di subjeya kurd de.