Hin hunermend bi awayekî berhemên xwe diafirînin ku ti pêwendîyeke jîyana wan li gel berhemên wan nîne û dibe mirov bêyî têgihîştina ji jîyana wan hunermendan li ser berhemên wan lêkolînan bike, hin hunermend hene berevajî vê yekê ne, jîyana wan karîgerîyeke zêde li ser berhemên wan danîye. Yilmaz Guney yek ji wan hunermendan e ku jîyana wî gelek bandor li ser berhemên wî yên hunerî danîye.
Em dikarin li ser komek nimûne ji jîyana Yilmaz Guney vekolin û bi vî rengî em têbigihêjin ka çawa jîyana wî bandor li ser berhemên wî danîye. Guney dibêje: “Dema ez zarok bûm hevalekî min hebû navê wî Silo bû, ew jî kurê cotkarekî hejar wek bavê min bû. Kurên axayan em neçar dikirin ku em lîstika hesp û faytonê bi wan re bilîzin, dîyar bû ku em hesp in û ew jî faytonên xwe bi me ve girêdidin û wan dixwest em li pêşîya wan bibezin. Carekê Silo nexweş ket, nexweşîyeke kûr û dirêj, ew birine bajêr ku çareyekê jê re bibînin lê Silo wek mirîyekê, bi faytonê anîn, êdî ji wê rojê pê ve ez qaîl nebûm di lîstika kurên axayan de bibime hesp.”